Newroz ji bo gelê Kurd ne tenê cejna biharê ye, kevneşopiyeke kûr e ku sembola azadî û berxwedanê ye.

Ev roja taybet ku li ser efsaneya Hesinkar Kawa û şahê zalim Dehak hatiye avakirin, ji bo Kurdan bûye destpêkek nû, sembola hêvî û biratiyê.

Wate û koka dîrokî ya Newrozê

Li gor efsaneyê; Dema ku Dehak zalim bi hovane li ser gel hukum dike, Hesinkar Kawa li hember vê zilmê serî radike û gel rizgar dike.

Bi vê berxwedana Kawa re rojeke nû ya bi navê “Newroz” dest pê dike. Ev roj weke sembola têkoşîna azadiyê ya bi hezaran salan a gelê Kurd tê dîtin.

Newroza Amedê: Her sal bi sed hezaran li heman qadê kom dibin

Weke her sal Newroza Amedê ya 2025’an jî bi beşdariyeke mezin hat lidarxistin.

Bi sed hezaran welatî li qada Newrozê hatin gel hev û berê xwe dan bîranîn û hêviyên xwe yên ji bo pêşerojê anîn ziman.

Dengê ji zeviyan bilind dibe: “Em aştî û aramiyê dixwazin”

Welatiyan li qada Newrozê ji Şoperêç re axivîn û diyar kirin ku ev roj ne tenê banga bîranîna paşerojê, ji nû ve avakirina siberojê ye.

“Newroz navê hêvî, biratî, azadî û aştiyê ye. Em aştî û aramiyê dixwazin. Biratî li ku ye?”

Ev gotin hesta hevpar a bi hezaran kesên ku li qadê kom bûn bûn: Edalet, wekhevî, pêşerojeke aştiyane.